[ إمبراطورية Chanel ]

شانيل اسم كبير في عالم العطور ..

وما أكون مبالغ إذا قلت إنها أكبر شركة عطورات ومستحضرات تجميل وملابس بالعالم ..

الشركة مملوكة بالأصل لـ مصممة الأزياء المشهورة “كوكو شانيل” .

تتميز ماركة شانيل بالعراقة .. أغلب منتجاتهم بيرفكت .. وقليل نحصل منتج ممكن نقول عنّه عادي أو مو كويس ..

مع العلم إن هالشي تسبب بغلاء منتجاتهم .. تقريباً هي أغلى ماركة بالعطور والتجميل على حد علمي .. من الماركات المتداولة أقصد ..

وإذا صارت فيه تخفيضات ما نحصل تخفيضات على منتجات شانيل .. لأنها شركة واثقة من منتجها وزباينها ..

على كثر ما رحت مع ناس يشترون عطور إلا إني قليل أروح معاهم لكونتر شانيل .. وإذا سألوني عن السبب أقول “شانيل مستواها راقي” !

مو إنّ اللي آخذهم مستواهم عادي .. لكن فعلاً شانيل ما تعجب أي واحد .. لأن عطورهم ثقيلة ومركزة .. أقصد إن ريحتها مو مثل أي عطر ثاني ..

وهذا خلا زباين شانيل خاصين ومن طبقة راقية شوي .. وممكن نقول “رويلتي” ..

طيب .. خلونا نبدا ..

أسماء عطورات شانيل معروفة .. كل عطر من عطوراتهم مميز وله عائلة أصناف ..

نبدا بأول وأشهر عطر .. مو بس لشانيل .. للعالم كله ..

يقولون إنّه أول عطر كـ سبري بالعالم .. وبلا شك للحين هـ العطر مازال رائع .. والكل يشهد بتميزه ..

NO.5

في عام 1921م بدأ العطر بالظهور .. وكان كـ هدايا تقدمها “كوكو” لأصدقاءها ومعارفها ..

وفي عام 1924م بدأ العطر يباع .. وما زال يتصدر قائمة العطورات النسائية .. تقول “كوكو شانيل” [أريد أن أمنح النساء عطراً مصنوعاً] ، وللحق تشكر على هـ العطر .

العطر ناعم وريحته فواحة .. مناسب للسهرات والإستخدام اليومي .. وبكل مرة أشمّ العطر أشوف فيه زاوية مختلفة .. قليل تحصل عطور ناعمة وثقيلة .. ثقيلة يعني ريحتها تبقى وما تتغير وتلفت الإنتباه حتى بعد فترة من بخّ العطر ..

الشركة طلعت منّه إصدارات وأشكال وأحجام .. وخط للجسم بودي لوشن وشغلات كثيرة .. اللي يستحق الذكر الـ أويل بتاع العطر .. شي غير طبيعي .. أنصح أي أحد يشتري العطر يشتري الزيت .. صح إنه غالي مع إنه 30 مل تقريباً .. بس يستاهل عن تجربة ..

طيّب .. نجب للعائلة الثانية تقريباً عند شانيل ..

Allure

أول عطر أشتريته من شانيل كان “ألور” الرجالي الأول .. فخم فخم فخم .. رجالي كلاسيك وجداً رائع بكل المواصفات ..

يصلح يومي .. ويصلح مناسبات .. ويصلح هدية برضو .. يناسب ذوق عامة الرجال لأنه كلاسيك ..

ومن عائلة ألور عندنا Allure Sport ..

النسخة الشبابية من العطر .. ممكن نقدر نقول كذا .. بـ ألور سبورت تغيّر بعض خصائص العطر وصار يناسب الطلعات والسهرات أكثر .. صار فريش وحلو وبقى فيه شي من الفخامة .. وتميز شانيل أكيد ..

بعده طلع ألور سبورت نسخة ثانية .. الصدق -بذوقي الخاص- شانيل ما توفقوا بالعطر هذا .. :/

لو طلع هالعطر شركة عادية كان أقول أوكي .. لكن شانيل تطلع عطر كلّه ليمون ! ما حبيت العطر أبداً .. وأستأت كثير منّه لأنه قبل يطلع كنت أنتظره ومتحمس أبشتريه .. لكن شانيل خيبوا ظنّي ..

نجي للعطورات النسائية من ألور ..

أول ما طلع منها ..

كل عطر من شانيل يخليك تقول هذا الأفضل .. ألور النسائي عطر راقي ورائع جداً .. يناسب السهرات أكثر .. ويصلح للإستخدام اليومي ..

وبعده طلعت شانيل الإصدار الثاني .. ألور سينسيل ..

صح هالعطر حلو وفيه إختلاف عن ألور الأول .. ولكن أنا أفضل الأول .. ما أدري ليه .. بس أحس الأول أهدى شوي .. يبدو لي الثاني فيه سبايس زيادة شوي خلا للعطر حدّة زايدة حبتين .. هذا رأيي الشخصي ويخالفني فيه كم واحد من معجبين شانيل ..

نجي بعد كذا للعائلة الأشهر من العطور النسائية .. Coco ..

لدرجة إن بعض الناس يعتقد إن كوكو شركة خاصة لأن لها أكثر من عطر .. وهذا بالطبع غلط فـ كل عطور كوكو تتبع لشانيل .. والعطر مسمى على اسم صاحبة الشركة “كوكو شانيل” ..

أول عطر منها كان كوكو الأول ..

.بالصراحة العطر هذا بالتحديد ما قد شميت ريحته .. لكن اخبر أكثر من مندوب مبيعات يقولون إنّه رسمي وإن مبيعاته أغلبها للحريم الكبار .. يبى إنّه عطر “كوكو” باسمها .. فـ أتوقع إنه حلو ..

العطر اللي شميته هو الإصدار الثاني منّه ..

العطر هذا من أنسب العطور كـ هدية .. يناسب مختلف الأعمار .. حلو ونعوم ..

اللي يذكر إن الوجه الدعائي للعطر كان الممثلة الشهيرة Keira Knightley

العطر للحين ماسك سعره وسوقه ويستاهل ..

Chance

من عطور شانيل المشهورة برضو .. عطر حلو وفريش .. يناسب البنات أكثر .. حبيته ،

الإصدار الثاني من تشانس .. فيه إختلاف عن الأول .. ولكنّهم نفس الجو .. على ما أذكر إن الأول أفضل ..

إذا تكلمت عن العطور وشانيل ما أنسى عزيزي وصديقي مراد وعطره المفضل Platinum

طبعاً هذا الإصدار الأول منّه قديم شوي .. الكلام عن الإصدار الثاني :

العطر رجالي فريش ورسمي .. جداً حلو .. يناسب المواعيد المهمة مثل الانترفيو وغيرها .. ويناسب السهرات برضو .. عطر حلو جداً ومن أفضل العطورات الرجالية .. يصلح برضو هدية شبابية أو رجالية .. يعني للرجال من 20-40 سنة ..

نجي بعده لعطر Egoiste

إذا كنت تشتري هدايا لأهلك .. وكان أبوك أو جدك كبير .. يعني عمره 40 وفوق .. وتورطت ما تدري وش تشتري له هدية .. فما لك إلا هالعطر ..

عطر من العود والفانيليا .. رسمي جداً وفخم .. يصلح لكبار السن مرة ..

تقريباً هذي أغلب عطورات شانيل .. يبقى كم عطر الصراحة ما أذكرها بالضبط ..

وودي أنبّه على شغلة ..

بالنسبة للعطورات النسائية فـ كل عطورات شانيل تقريباً طلع منها بارفيوم وتواليت .. الفرق إن البارفيوم أقوى وأكثر تركيز .. ونصحيتي للجميع بكل العطورات إنهم ياخذون البارفيوم .. صح إنه أغلى شوي .. بس أفضل واقوى واكثر ثبات .. وللأسف ما فيه عطورات بارفيوم رجالية .. البارفيوم نسائي بس .. :/

واللي يتحمس ويشتري شانيل يحافظ عليه .. يعني لا يخليه بمكان فيه شمس لأن شمسنا تخرب العطور .. وشانيل عطورهم من النوع اللي ما ودك الواحد يخرّبها ..

اللي يشتري العطر وما يستخدمه فترة ممكن يحطه بالثلاجة ! ، هذي نصيحة من أكثر من واحد يبيعون عطور وعارفين شغلهم .. وفعلاً مجرّبة .. وعموماً لازم تحرص إنو الغرفة اللي تكون فيها العطور تكون باردة وجوها رطب نوعاً ما .. انتبهوا من الحرارة حتى ع العطور الأصلية ..

ويبقى إنّا نقول إن تميز شانيل ما كان بالعطورات بس .. حتى مستحضرات التجميل عندهم جداً مميزة .. أذكر الأرواج عندهم حلوة ودرجاتها رائعة .. برضو كريم الأساس أذكر طلعوا واحد من فترة وكان فيه ميزة ترطيب مع إنو كريم أساس .. وكم شغلة ثانية .. وما ننسى إن اسعارها أغلى من الماركات الثانية ..

سوري ع التأخير بهـ التدوينة من زمان ببالي وما أفضى ..

وإن شاء الله بكتب تدوينة برضو أو ثنتين قبل العيد ،،

متعلقات

23 تعليق بواسطة mohand في سبتمبر 9, 2008

أدرج في [ مملكة العطور ]

الوسوم Allure, chane, Chanel, coco, no.5, parfume, platinum, شانيل, عطور, كوكو, هدية

8,292 قارئ

23 تعليق

Dantil قال:

سبتمبر 9, 2008 عند 1:47 م

:

:R

الله الله
هالموضوع فوَّح عطره
العطر الأول أحبه كثير

أحلى مافي شانل
إنها ماركة تليق بالهدايا الراقية فعلاً :+
Huda قال:

سبتمبر 9, 2008 عند 3:57 م

شانيل ماركة ما عليها كلام .. أحسها تناسب كل الأذواق حتى لو ما اشتروها .. يعني الكل تعجبو ..

ناوية أشتري تشانس .. أحسه هادئ شوية ونعومي وياي عليه ههههه

كوكو شانيل نايس بس أحسه قوي شويه ما ينفع فالنهار

مجرد وجهة نظر ههههه

أكثر شئ عجبني هونه إني أخذت خبرة عن العطورات الرجالية
لأني ما أفهم فيها كثير .. بس شجعتني أشتري ألور
e7sasy قال:

سبتمبر 9, 2008 عند 5:09 م

شانيل حلوه بكل شي ..

انا افضل عطر ألور الأول ..
و Chance الأخضر .. استخدمه الحين .. :+

عطورها مميزه وتستاهل تدفع عليها ..

يعطيك العافيه .. :R
سارّة المغلوث قال:

سبتمبر 9, 2008 عند 9:39 م

المشكلة اللي ما يعدي العطر عندي شهر :~
المشكلة هذي لاحظتها بالبيت كلنا!

غالب المذكور جربته .. لكن الآن ما بقى عندي من شانيل
العام حبيت أهدي وحدة من زميلاتي وأنا بالمجمع وهي معي!
فما كان قدامي إلا أستأذنها ورحت أخذت لها عطر تشانس – الوردي – .. حسب ما أذكر خفيف وناعم وكلاسيكي حتى للدوام الصبح
TO0OP قال:

سبتمبر 9, 2008 عند 10:11 م

سابقا اهديت الور سبوت واعجب اللي اهديت له

استخدمت شنص وكوكو

>>لكن مشكلة الشانيل يمل بسرعة لانة مرة قوي وحاااار , حدة اللي بيشتري يشتري مقاس صغير :-
sara قال:

سبتمبر 10, 2008 عند 8:12 ص

انا انسانه اعشق no.5وما اتعطر الا فيه …
لدرجة لمن احد يقولي جربي هذا العطر ارفض<<no.5 addicted
مهند قال:

سبتمبر 10, 2008 عند 12:50 م

Dantil

أنا برضو حبيت No.5 كثير ..
الصدق إني ما استخدمته للحين .. لكن أذكر جتني عينة من الأويل بتاعة .. وأستخدمتها كم مرة .. وااااااااو

صدقتي .. شانيل ماركة فخمة و”رويلتي” وتبيض الوجه بالهدايا وغيرها ..

حيّاك ،

.. ،

Huda

هي صح ماركة عليها الكلام ..
لكن اللي ذوقهم يحب الأشياء اللي حيل فريش أو فواكه ما راح يحصل اللي يبيه بـ شانيل ..
لكن هذا ما يقلل من قيمتها .. بالعكس عندي انو هالشي خلاها سبشل ..

تشانس حلو وراقي .. ويستاهل بصراحة ..
كوكو يصلح سهرات أكثر منّه إستخدام صباحي .. رأيي برضو ..

ألور حلو وفعلاً يصلح هدية ..
إلا اللي بالليمون .. :*
يقولون نزل ألور سبورت وايت .. أذكر قد شميته مرة لكن ناسي .. واذكر إنه افضل من أبو ليمون .. :~

حيّاك ،
مهند قال:

سبتمبر 10, 2008 عند 12:58 م

e7sasy

ألور وتشانس حلوات ..
وفعلاً كل عطور شانيل حلوة ..

الله يعافيك ،

.. ،

سارّة المغلوث

مب مشكلتك لحالك !
أنا أساساً ما أقدر إنو يكون عندي عطر واحد بس !
لازم ثلاث إلى خمسة عطور .. هذا الشي العادي ..
أذكر قبل سنتين ممكن كنّا مهابيل أنا وأخوي ..
يعني ممكن بالغرفة عندنا 15-20 عطر .. واذا قربت تخلص يعني بقى خمسة كذا رحنا السوق وضفينا واجد ..
وبرضو عطوري تخلص بسرعة .. ما يكمل شهرين الا الخمسة عطور خالصة .. أو ثلاثة منها ع الأقل ..

تشانس بناتي .. ومناسب كـ هدية ..

حيّاك ،
مهند قال:

سبتمبر 10, 2008 عند 1:04 م

TO0OP

إختيار حلو .. الور سبورت مناسب هدية ..

فعلاً .. فيه ناس ما تحب العطور السبايس واللي تصير قوية .. يعني ريحتها مركزة ..
خصوصاً اللي عندهم جيوب أنفية أو ربو .. أو اللي عندهم حساسية من الروائح القوية والتوابل ..
وهذولا لازم يراعون أنفسهم وما يستخدمون أي عطر ..

حيّاك ،

.. ،

sara

No.5 خطير ورائع ..
لكن دايم أنصح إنو يكون عندك عطر أو عطرين غير عطرك المفضل ..
لأنه بكذا فيه تنويع وعشان ما يصير العطر مكرر وممل ممكن ..

إذا تحبين No.5 فـ أنصحك تقرين التدوينة الجاية اللي عن العطور .. لأن فيها كم عطر قريبة مرة من No.5 وممكن تعجبك ..

حيّاك ،
هذيان قال:

سبتمبر 11, 2008 عند 6:16 ص

آآآخ يدووووخ الموضوع
شانيل (L)
أحلللللللى شي بالعطور :$
كوكو وبس :$
بس الله يقطعهم مررررررة رفعوا سعره صار الحين بـ 400 ريال ;;)
الله المستعان بس …
ومع هذا يظل أخقق الأخققين :$

شكرا ً مهننند .. N
سارّة المغلوث قال:

سبتمبر 11, 2008 عند 6:20 ص

فعلا!
أنا الآن فكرت نفسي ميتة
برضو، أتوقع إني بحاجة مرة للمقاضي نظارات وعطورات!
-> قبل كم يوم بالسفر كنت أبد ما لي حاجة أشتري شي :Z
الـ ج ــاذبية قال:

سبتمبر 12, 2008 عند 2:04 ص

شانيل مررره حلوه بكل شي >>
حتى مكياجها خصوصا كريم الاساس رووووووووعه ..

شوووووكرررررن ملاذ الروح >>
عبدالله قال:

سبتمبر 12, 2008 عند 5:31 ص

مهند كنت أنتظر منك تدوينة من فترة..

مثل ما تقول قرّب العيد وودك بعطر.. عطرين كذا..

عموماً أنا سجلت بلاتنيوم وإقويست.. أبشوفهم ويارب يعجبوني..

وألورر سبورت جربته قبل 4 سنوات .. كان ممتاز.. وقبل فترة شميته ولا أعجبني مدري تغيرت ريحته أو ذوقي اللي تغير .. :/

والنسائي منه جذاب وحلو.. وريحته قوية ..

برايفت

مهند الحين أستخدم تشيك النسائي وأرمني كود .. وودي بعطر يصلح لهذا الذوق .. مهب شرط رجالي..
مراد قال:

سبتمبر 12, 2008 عند 12:54 م

وهـ بس يا بلاتينيوم

هذا العطر لا منهم قالوا عطر :S <<< لا تدخن الناس صايمة :#

مهند تخبر الزيت حق نمبر 5 اللي اعطوني اياه دبنهامز قبل 9 شهور تراه للآن بالدرج متحسف اني استخدمه قلي وش اسوي :%

على طاري نمبر 5 شانس معجبني بصراحة وافكر اشريه لو انه نسائي والله موب شغلي العطر حلو

اذكر اول عطر استخدمته من شانيل كان ألور وهالكلام يمكن قبل 4 سنين بنصيحة من “محمد المغلوث”

الله يذكر ذاك العيد طقمنا انا وياه العطر والشماغ والكنادر الظاهر

بس اخالفك بشغلة العالم ما تشري شانيل مو لأنه راقية راقية لكن لأن عطورها قامت تقب بقوة

أجل عطر كان بـ 320 صار الآن 450

اغلى من كيس الرز ياخي

تتوقع ان موظفين ارامكو تجيهم العطور هدية من شانيل نفسها
mohand قال:

سبتمبر 14, 2008 عند 4:41 م

هذيان

صدق جداً غالية الماركة .. وهذا اللي يقهر ..
كوكو حلو بس سبايس شوي ..

العفو ..

حيّاك ،

.. ،

سارّة المغلوث

نظارات لا الحمد لله من فترة قريبة شاري نظارات ..
بس العطور من فترة ودي أشتري .. وجالس أخطط ..

إن شاء الله التدوينة الجاية بتكون عن آخر العطور اللي نزلت .. فيه عطور تسوى وعليها الكلام ..

حيّاك ،
مهند قال:

سبتمبر 15, 2008 عند 11:26 ص

الجاذبية

جداً حلو ..
برضو منتجات العناية بالبشرة حلوة ..

العفو ..
حيّاك ،

.. ،

عبدالله

بلاتنيوم راح يعجبك إن شاء الله ..
إقويست مشكلته رسمي مرة .. وممكن ما تحب قوته ..

يمكنك شميت ألور سبورت الجديد .. أو ألور سبورت وايت ..
تأكد إن قارورته لونها فضي ..

امممممممممم
إذا تبي رجالي عندك عطر AQVA من Bvlgari .. جداً حلو .. رجالي طبعاً ..
عندك عطور قوتشي برضو .. بتحصل فيها شي يعجبك ..
مهند قال:

سبتمبر 15, 2008 عند 11:38 ص

مراد

استخدم الزيت ياخي ..
أنا استخدمته أكثر من مرة .. وللحين باقي منه ..
استخدم شوي .. وما شاء الله تصدق إنه ريحته تصير أقوى من العطر أنا اللي أنا حاطه أساساً !

شانس حلو .. ويستاهل ،
وإذا صار نسائي .. أشوا إن ثلاث أرباع العطور اللي عندي نسائية .. :-

فعلاً أنا استخدمت الور أول شي .. بس هـ الكلام قبل سبع سنوات ممكن أو حولها ..
محمد ذوقه حلو .. يكفي إنه يحب أرمني كود .. :$

أبداً .. كل العطور ارتفعت أسعارها ..
صح شانيل أغلى .. لكن العالم تشتري غير شانيل ..
عندك مثلاً فلور بمب قيمته 635 .. وNo.5 تقريباً سعره حوله أو أرخص شوي ..
وقليل يشترون No.5 .. العالم تحب العطور اللي زحمة شوي .. يعني اللي ريحتها مركزة وعلى زهرة وحدة ما يفضلها إلا المتذوقين .. وهم قليل ..

وعشان كذا شف منتجات شانيل واجد .. تلقى مع العطر أشياء كثير بعكس الكثير من الماركات ..
يعني عندك الأويل .. والبودي لوشن .. وخلاصة العطر -تجي 7مل- .. وأحياناً جل .. وطبعاً شامبو .. وعطر شنطة .. وعطر للشعر .. وشغلات برضو ..
كل هذي منتجات لـ No.5 .. ولغيره من عطور شانيل ..

ويبقى الغلاء سبب برضو .. ومثل ما قلت بالتدوينة .. شانيل شركة واثقة من منتجاتها .. وإذا ما سوت عروض ولا رخّصت تدري إن زبيانها بيشترون منها كذا والا كذا ..

شوكرن مراد ،،
[ .. رايق .. ] قال:

سبتمبر 27, 2008 عند 6:15 ص

مهننننننند يا حبي لك والله بوقتك

ممدوحن لي عطر تشانس وبروح اشتريه تتوقع يصلح لي مع انه نسائي ؟

قبل فتره شريت بيربري النسائي .. عادي او احسن شوي بس من العادي .. !

طيب استاذ مهند ووش تتوقع بيزبط علي من العطور حقت شانيل لاني مخطط اشري لي عطر من عندهم للعيد ؟
bondo قال:

أكتوبر 21, 2008 عند 9:35 ص

الور سبورت من شانيل خطييييييييييييييير وكلمة خطير شوية عليه
انصح كل الشباب باقتنائه رهيييييييييب مرة وجذاب وفخم
بس غالي شويه كنت شاريه من كام يوم 395 :#

بس مش خسارة فيه
FDWA قال:

نوفمبر 18, 2008 عند 6:01 م

حلوه عطورات شانيل :+
بالنسبة لي إقتنيت كوكو فقط من زماااااااان أول مانزل ولا عاد شريته بعدها
عبير الحب قال:

ديسمبر 2, 2008 عند 1:47 م

رووووعهـ :yho لكن ياريت تجيبولينا شنط وأحذية من شانيل لأني أموووت عليه :%

وفي اسرع وقت ممكن ؛ :$

ممكن ! :/
فيصل قال:

مارس 20, 2009 عند 4:36 ص

يات بنت احلى عطر رجالي ينسب جميع الاوقات
من شانيل
وللعلم فى عطر حلو بامره من فالنتينوووووووو
nkhat قال:

يوليو 29, 2009 عند 1:07 م

شكرا على الموضوع الوتعريف ببعض المنتجات لشانيل بالفعل الماركه عالمية مميزه دائما واعتقد افضل عطوراتها no.5 وكوكو …. ونبمر 5 هاهو بجني وقبل قراءة موضوعك تعطر منه وبالفعل الرد جاء في وقته
في انتظار الحديث عن جيرلان