يالله حيّهم ..
هذا الجزء الثاني من تقرير سفرة “شهر العسل” إلى النمسا وألمانيا صيف ٢٠٠٩ ..

.. ،

وصلنا سالزبورغ

سالزبورغ هي أشهر مدينة بغرب النمسا .. وهي من المدن المعروفة بالنمسا عالمياً .. وهالشهرة ترجع إلى إنه انولد فيها واحد من أشهر الموسيقاريين على مستوى العالم فولفغانغ أماديوس موتسارت أو “موزارت” ..

مدينة جميلة جداً .. هادئة نسبياً .. حبيناها كثير ..

وصلنا لها ع العصر تقريباً .. وكنّا ساكنين بـ Crown Plaza فندق جيّد .. وأتوقع لو بحثت كان لقيت أفضل ..

كان الفندق قريب جداً من الترين ستيشن .. بالمشي ياخذ خمس دقايق تقريباً ..
طبعاً ما عرفنا إلا بعد ما ركبت التاكسي وقلت له كراون بلازا .. ولف بنا لفة صغيرة وأخد مدري كم يورو .. D:

من مميزات سالزبورغ إن فيها أكثر من مكان ممكن تروح له .. وبرضو قريب منها قرى كثرة ممكن توصلها بالقطار أو بالباص ..
ما ركبت فيها أندرقراوند ويبدو لي مافيها ..

أول شي قررنا نزوره : بيت موزارت .

سمعنا عنه كثير .. وقالوا لنا عنه وإنه مكان جداً حلو ..
بحكم جلوسي بسالزبورغ بيكون أربع أيام تقريباً فـ أخذت فيها “سالزبورغ لاند كارد”
وهي بطاقة تخليك تركب الباصات مجاناً وتدخل بعض المعالم المشهورة مجاناً وتخفض لك ببعض الأماكن ..

كانت تكلفتها الشخص لمدة أربع أو خمس أيام ٣٠ يورو تقريباً .. والسعر معقول إذا شفنا الأشياء اللي بتطيحها عنك .. فعلاً سعر منطقي ..

وتلقاها غالباً بالفنادق أو الأماكن العامة ..

ركبنا فيها كل الباصات اللي تنقلنا فيها داخل سالزبورغ ودخلنا فيها بيت موزارت مجاناً .. مع إن تذكرة الدخول للشخص بحوالي عشرة يورو إذا مني واهم .. وموزارت له بيتين مو واحد ..

طلعنا لمحطة الباصات بحكم إنها عند الترين ستيشن وسألنا اللي هناك عن الباص اللي يروح لموزارت .. ودلونا عليه ..
طبعاً في أغلب الأماكن اللي فيها سياح كثير تلقى ناس يرشدونك .. وبكل مكان تلقى مكتب معلومات “Information” ..

نزلنا من الباص عند مثل البوابة .. كانت مدخل لمكان فيه محلات على جوانب الطرق .. وبيت موزارت بالنص ..
ببداية المكان هذا لقينا مكتب انفورميشن وحاطين عند الباب نشرات مجانية .. بالنشرة فيه خريطة توضيحية للمكان ووين المعالم المهمة فيه ..

كان سوق تقريباً .. أغلب المحلات ملابس .. وفيه سوق خضار بسيط بساحة صغيرة ..

لقينا بيت موزارت .. دخلنا وكلمتهم على البطاقة اللي معاي ودخلنا مجاناً ..

كان هذا البيت الأول اللي انولد فيه موزارت وعاش طفولته وأول شبابه ..
البيت كان بسيط .. وبكل غرفة فيه صور ومعلومات ..

وما أمداني أصور الصورة الا يجيني واحد ويقول : بعض الغرف هنا ممنوع فيها التصوير .. وهذي الغرفة منها ..
رجاءً لا تصور ..

ما قدرت أصور الباقي ،، كانوا حاطين بيانو بالنص وع الجدران رسومات مختلفة لموزارت ..

يقولون البيانو هذي كان موزارت يعزف عليها وهو صغير ..

حول بيت موزارت الأول كان فيه كوفيات كثيييير ..
وبكل المدن اللي زرتها الكوفيات كثيرة جداً .. وصراحة المكان هناك يخليك تستمع فعلاً بالكوفي شوب وإنك تقعد وتاخذ لك كوب كوفي مع الجو الرايق والمطر أحياناً شي ما يمكن يصير لك دايم بالسعودية مثلاً ..

طلعنا بعدها وقطعنا نهر السالزاك عشان نروح بيت موزارت الثاني ..

وقالوا لنا انو التصوير بكل المكان ممنوع ..
كان البيت الثاني عبارة شرح لمسيرة موزارت الفنية وكيف تعلم الموسيقى والآلات اللي عزف عليها ..
وجايبين صور للآلات اللي عزف عليها فعلاً وهو صغير ..

تمشينا بالمنطقة اللي حول البيت .. كانت منطقة حلوة ومافيها زحمة ..

قررنا نرجع الفندق ..

رجعت لموقف الباص اللي نزلنا .. وتذكرت رقم الباص ..
وكنت متخيل إني عرفت فكرة الباصات .. يعني باص ثلاثة جينا معه وكان متجه شمال ..
أكيد لو جا باص ثلاثة متجه جنوب بيرجعنا للفندق !
وأنا أفكر جا باص ثلاثة متجه جنوب .. حلووو

ركبنا وزوجتي تسألني : أنت متأكد من رقم الباص ؟
رديت بكل ثقة : ايوه ..

مشى الباص .. كنت عارف الطريق تقريباً .. يعني عارف الشارع اللي المفروض نمشي معاه ..
ما دخل بالشارع نفسه .. استغربت وقلت بنفسي : أكيد بيروح مع طريق ثاني .. لأنه بالنهاية الفندق عند محطة الباصات -موقف الباصات الرئيسي- فـ لازم يروح من هناك ..

مشينا مع شوارع غريبة .. وفجأة صار الباص يمشي بالحواري .. والعالم اللي تركب يطالعونا مستغربين .. وش جاب ذا السيّاح هنا ؟
بعد حول ساعة عرفت إني مضيع .. رحت للي تسوق الباص وقلت لها : الحين الباص هذا بيمر محطة الباصات ؟
ردت عليّ : تشو غربات بلا بلا ..

يوووه .. وش ذا الوهقة .. ما تعرف انقليزي ..
والتفت والا كل اللي حولها عجز وشيبان مثلها وكلهم متنحين ..

نزلنا عند أقرب موقف ..
بديت أقرا الورقة اللي فيها مواعيد الباصات .. وأسأل كل باص جاي ..
وكلهم ما يعرفون انقليزي ..
بعد ما وقفنا ربع ساعة بالشارع صار الوضع يخوف شوي ..
ركبنا وقربنا الباص من جهة وسط المدينة شوي ..

نزلنا من الباص لنفس السبب .. نص ساعة وحنا ما ندري وينا فيه ..
انترنا لين جا باص وكنت قاري بالورقة بيروح للترين ستيشن .. سألته طلع رجال ويعرف انقليزي ..
قال حنا رايحين محطة الباصات .. وااااو ما تدرون وش قد الفرحة اللي كنّا فيها ..

وبعد حول ساعتين من الدوران والتضييع وصلنا الفندق ..

إطلالة الفندق بالليل ..

هذي نهاية الجزء الثاني .. الجزء الثالث قريب إن شاء الله ،،

متعلقات

• [ ليالي أوروبية (١) - تقرير شهر العسل صيف 09 ] (10)
• [ هل لنا أن نعود؟ ] (2)
• [ هل تُبكى الجمادات !؟ ] (40)
• [ أنا MAC'e ] (47)
• [ ومضى رحيم! ] (19)