عودة بعد إنقطاع طوووويل .. وإن شاء الله نستمر هالمرة ..

الشكر للأخ العزيز “عبد العزيز الهميلي” على جهوده لتظهر المدونة بالشكل هذا .. تعبناك معنا يالغالي ..

.. ،

كان المفروض التقرير نازل قبل أكثر من ستة أشهر .. لكن الإهمال والتسويف خلتني أنساه .. وقررت إني أنزله الحين ..

كانت السفرة من تاريخ ٣ /٧ /٢٠٠٩ يوم الجمعة ..
طلعنا من الرياض على طيران الإمارات إلى دبي .. كان المفروض ترانزيت -الانتظار بين رحلتين متواصلتين- ١٢ ساعة تقريباً .. فـ قررت نقعد بدبي يومين ثم نطلع فيينا ..

مافيه شي كثير بدبي .. ذاك الوقت كان غبار فما كانت الطلعة تستاهل .. وكانت دبي بس راحة ..

طلعنا من دبي الساعة ٨ الصباح .. كان الجو مش كويس أبداً ..

صراحة كانت الرحلة ممتعة جداً ..
طيران الأمارات من أفضل شركات الطيران بالخليج والشرق الأوسط تقريباً .. وصراحة كانت خدمتهم حلوة ومقاعدهم جداً مريحة ..

الرحلة كانت خمس ساعات تقريباً .. وكان البرامج الترفيهية بالشاشات اللي قدام المقاعد تنسيك طول الرحلة ..
كان لنا شي خاص مخلي رحلتنا ممتعة ..
بنت صغيرة خبلللللة ..

كانت مقاعد الطيارة بنظام ٣-٤-٣ كنت أنا عند الدريشة وزوجتي بالنص وجنب زوجتي أم البنت هذي ..
بالبداية البنت ما كانت معاها .. بس بعد ما أقلعنا بنص ساعة ممكن جت عندها ..
وقعدت تستهبل علينا .. وجلست أنا ألعب معاها .. وضحكت عليها وعلى حركاتها ..
سولفت زوجتي مع أمها شوي وطلعت العائلة من التشيك وكانوا طالعين لفينا إجازة برضو ..

اللي يضحك إن البنت الخبلة راحت لأبوها اللي جالس مع إخوانها بالمقاعد اللي بالوسط وتجره تبيه يلعب معي .. استانست الظاهر D:

يوم قربنا وبدا الجو يضبط والسحاب شي مب طبيعي .. وكل شوي ندخل بسحابة ..

أعلنوا إن الطيارة بتهبط وبدينا نتجهز ..
وقفت الطيارة بس قررنا نقعد لين يقومون أغلب الناس .. مافيه داعي نقوم وسط الزحمة والعالم بس تبي تطلع من الطيارة ..
كان الجو برا حلو .. ومطار فينا على صغره إلا إنه لطيف ..

ونزلنا ووقفنا بسرا الجوازات اللي كان طويل نوعاً ما .. بس مشينا بسرعة ..
رحنا للمكان اللي بناخذ منه شناط .. وقعدت أدور عربية أشيل الشناط فيها .. لقيت صف عربيات وبكل ثقة سحبت وحدة .. وما طلعت !
ياولد .. عدل بدل .. ماش عيّت تطلع .. اكتشفت بعد عدة محاولات أنك لازم تدخل نصف يورو -خمسين سنت- في مكان صغير عند الممسك بتاع العربية عشان تقدر تسحبها ..
وكنت بالصدفة توني صارف الكاش اللي معي .. وطحت بمشكلة ثانية ما معاي الا يورو واحد .. ما معاي نص يورو .. وش ذا القلق ..
قلت بنفسي : مالي خلق أدور صرف والا أمسك سرا عند الصرافة مرة ثانية .. فـ دخلت اليرور .. ومجرد دخل اليورو طلع لي من نفس المكان نصف يورو .. يعني رجعوا لي الباقي على طول بدون أي قلق ..

أخذنا الشناط وطلعنا ..
وأنا طالع جاني واحد قال لي : السلام عليكم !
أنا : عليكم السلام .. فرحت لقيت أحد عربي ..
الرجال : تبغى تاكسي !؟
أنا : مشكور لكن الحين عندي شغلات أبي أخلصها .. شكراً
الرجال : طيب أنا عربي !
أنا : ايوه عارف .. لكن ما أبي أطلع الحين!

راح وهو يتحلطم وأنا مستغرب وش سالفته ذا الحين!!

كانت النية عندي آخذ شريحة جوال من المطار لأني ما أخذت جوالي تركته بالسعودية .. كنت ماخذ معاي جهاز وناوي أشتري شريحة ..
المشكلة كنت نازل يوم الأحد وكانت أغلب المحلات مسكرة .. ومالقيت شركة اتصالات بالمطار فاتحة ..
بعد مادرت وتعبت لقيت واحد نمساوي .. ناداني وسلم علي وقال : أنت مسافر صح ؟
قلت ايه!
قال : حنا شركت تكاسي .. وعندنا خدمة ممكن تعجبك !
أنا : وش الخدمة ؟
الرجال : أنت نازل أي فندق ؟
أنا : الميرديان .
الرجال : الخدمة اننا ندخل اسم الفندق بالجهاز وهو يطلع السعر .. وما راح ناخذ عليك زيادة أبداً .. يعني بدون عداد وحساب ولو كان فيه زحمة ممكن يزود ولا شي ..
أعجبتني الخدمة واكتشفت بعد السؤال إني وفرت على نفسي خمسة يورو تقريباً يعني ٢٥ ريال !!

وسبحان الله الفرق بين النمساوي والعربي بالأخلاق وطريقة عرض الخدمات .. شي غريب صدق!

طلعنا وكان السواق واحد عربي برضو .. إنسان مؤدب وساكت أغلب الوقت ..

طلعنا من المطار وكان المشوار بعيد شوي .. ياخذ ثلث ساعة تقريباً ..
يوم بعدنا عن المطار شوي وتبدا تمطر .. يالله!

جو خياااااااالي والشجر يمين ويسار والأنهار بكل مكان .. سبحان اللي عطاهم جنتهم بدنياهم ..

وصلنا بعدها للفندق .. وكان اختيار موفق جداً جداً .. فندق راقي وتعامل محترم وفخم ونظيف ..

دخلنا الغرفة وكانت مطلة ع الشارع .. منظر الشارع جداً حلو بكل وقت .. الشجر معطية جزء كبير منه والمباني الكلاسيكية الفخمة تملى المكان ..

ارتحنا شوي بعدين طلعنا .. تمشينا بالمكان اللي حول الفندق وكان مكان لطيف جداً ..
فيه أسواق بس مقفلة عشان يوم الأحد .. وفيه مبنى كبير عرفنا بعدين انه مثل الأوبرا اللي فيها مسريحات موسيقية أو حاجة زي كذا ..

صار موقف مضحك جداً قد كتبته قبل :

لقينا “Subway” بتاع الساندوتش وأخذنا منه ساندوتش وكان جداً لذيذ ..
وحنا راجعين لقينا سوبرماركت وأخذنا منها شغلات خفيفة ..

رجعنا الفندق ونمنا بدري لأن ورانا مشوار للشانبرون بكرا ..

.. ،

قمنا الصباح ونزلنا أفطرنا وبعدها بدلنا وطلعنا لقصر الشانبرون ..
قصر الشانبرون من أشهر معالم فينا وفيه حديقة خاصة فيه وبالحديقة حديقة حيوان حلوة ..

رحنا بالميترو .. قبل أروح سألت واحد من موظفي الفندق كان واقف عند الباب كيف أوصل الشانبرون وشرح لي كيف أوصله عن طريق الميترو وكان شرحه سهل وواضح ..

وصلنا الشانبرون وكان قصر كبييير في ساحة أمامية كبيرة وعنده سياح كثييييير ..

يوم قربنا من القصر التفت على زوجتي وقلت لها : والله أنا إنسان ما أحب الآثار والتراث والخرابيط هذي ..
قالت : حتى أنا !

فقررنا ما ندخل الشانبرون .. وشفنا شي أحلى منه بكثيييير ..

ركبنا مع ذا الشايب .. كانت العربة ممتعة جداً .. قعد يمشينا على حديقة الشانبرون ..وكلها شجر وورد ومناظر جميلة جداً ..

بعد لفة حلوة ع الحديقة نزلنا الشايب ورحنا مشي لحديقة الحيوانات ..

حديقة الحيوانات مشهورة برضو .. وأكثر شي مشهرها حيوان “الباندا” النادر .. عندهم واحد ..
صراحة الحديقة لحالها يبي لها صور وتقرير .. تستاهل الزيارة ..

رجعنا الفندق بالميترو بنفس الطريقة .. الميترو سهل بس يحتاج تفهم فكرته ..

ريحنا شوي .. وبعدها قلنا بنطلع نتقهوى ونتمشى ..
لقينا محل لطيف جداً وحنا نتمشى حول الفندق وتقهوينا فيه ..
بعدها طلعنا نمشي برضو ولقينا مبنى ضخم جداً وعريق ..

ويبدو إنها كنيسة كبيرة .. المبنى ضخم جداً لدرجة رحت بعيد وما قدت أصوره كله لأن عنده حديقة كلها شجر ..

رجعنا ونمنا ..
من بكرا قمنا ونزلنا أفطرنا بمطعم الفندق ورقينا بدلنا ..

ثم طلعنا بتاكسي لمحطة القطارات وركبنا قطار متجه لمدينة “سالزبورغ” المحطة الثانية ..

دخلت محطة القطارات وأنا ما أدري وش بسوي بالضبط .. لقيت آلات تعطيك تذكرة القطار للمكان اللي تبيه لكن مشكلتي ما قريت عنها كويس من قبل ولا ودي أحوس نفسي ..

كنا ماشين ومعنا شنطنا وحوسة شوي .. شافني واحد واضح إنه من الموظفين تبع شركة القطار ..
قال لي : ممكن أساعدك بشي ؟
أنا : ايوه أنا أبغى أطلع سالزبورغ وأبغى تذكرة .. ممكن تدلني على شباك بيع التذاكر ؟
الموظف : ما يحتاج .. هذي آلة بيع تذاكر ..

رحنا عند الآلة وجلس يشرح لي الطريقة .. كانت الآلة ذكية وسهلة جداً .. وكان شرحه واضح جداً ..
كنت عارف موعد القطار لأني طالب من الفندق قبل أطلع أوقات رحلة القطار من فينا إلى سالزبورغ وهذا الشي يخفف من وقت الانتظار الممل في محطة القطار ..
أخذت التذاكر وشكرته .. قال لي : أسرع ترا القطار بيمشي ..
رحنا وكانوا الناس ركبوا أغلبهم .. قعدت أمشي وكل ما قابلني واحد من اللي يشتغلون بالقطار وريته التذكرة ويقول : قدام ..
لين وصلت آخر عربة ركاب .. ركبنا وحطيت العفش بالمكان المخصص .. كانت العربة مب مليانة وكراسيهم كبيرة ومريحة واستاااانسنا ..

بعد ساعة تقريباً كان بتاع التذاكر يشيّك على اللي معاهم تذاكر واللي ما معاهم .. يوم جا عندنا وبكل ثقة عطيته التذاكر وأنا مستانس .. وقف شوي وقعد يشوف التذكرة شكله يتأكد ..
ثم قال : ترا هذي الدرجة الأولى !
أنا : امممم طيب !
الموظف : تذكرتك درجة سياحي !
أنا : هاه!
الموظف : إذا العربة عاجبتك ممكن تدفع الفرق وتقعد !
أنا : لا هونت .. شكراً وآسف ما كنت أعرف !
الموظف : عادي .. ترا العربة اللي ورا هذي سياحي إلى آخر شي ..

قعدت أجرّ أذيال الخيبة مع الشناط وأنا أمشي بين العربات أدور مكان ..
وبعد أربع عربات الحمد لله لقينا مكان كويس ..

ضروري الواحد يتأكد من نوع تذكرته بأي مكان قبل يتفشل ..

بالطريق بين فينا وسالزبورغ صورت بالكاميرا أكثر من ١٠٠ صورة .. مناظر خلابة وجميلة تخلي الواحد غصب ما ينزل الكاميرا ..

هذا الجزء الأول من التقرير ..
الأجزاء الباقية بتنزل هنا بالمدونة إن شاء الله ،،

متعلقات

• [ ليالي أوروبية (2) ] (12)
• [ هل لنا أن نعود؟ ] (2)
• [ هل تُبكى الجمادات !؟ ] (40)
• [ أنا MAC'e ] (47)
• [ ومضى رحيم! ] (19)