Armani من الشركات الكبيرة جداً في مجال الجمال والأناقة .. سواءً كان بالملابس أو الشنط والمحافظ أو غيرها من مستلزمات الجمال والأناقة ..

تصنّف من الشركات الراقية .. ولذلك أسعارها مرتفعة نوعاً ما ..

طبعاً فيه اسمين لأرماني .. Giorgio Armani و Emporio Armani

عشان أكون صريح .. ما أعرف بالضبط وش تميز جيورجيو عن امبوريو .. لكن من خلال ملاحظتي أحس إن جورجيو أكثر بالعطور والمحافظ والشغلات هذي .. وامبوريو أكثر بالملابس الداخلية والملابس العادية .. الفرق هذا مب دقيق لكن ملاحظ ..

أبدا بأول عطر أستخدمته من أرماني .. وبنظري أفضل عطر عندهم .. وأتذكر صديقي الغالي محمد المغلوث من الناس اللي يجون ببالي إذا شميت العطر .. لأني أتذكر إنّه يقدّره ..

Armani Black Code

عطر من أجمل وأفضل العطور الرجاليّة اللي شميتها ..

رسمي وفريش بنفس الوقت .. يصلح لأكثر من إستخدام .. عطر يومي .. للعمل والطلعات .. برضو يصلح عطر سهرات ومناسبات ..

من العطور اللي تصلح هدية .. يناسب أغلب أذواق الرجال ..

وأذكر مندوب أرماني كان يقول : إن فيه بنات يجون يشترون العطر هذا لهم .. وما أستغرب لأن العطر ممكن يستخدم نسائي ..

العطر جداً مميز واللي ما جربه بيحبه ..

نفس الخط .. طلعوا أكثر من عطر ..

من المميز منها العطر النسائي ..

من العطور النسائية الجميلة برضو ..

عطر يناسب السهرات أكثر .. وأذكر كان فيه عرض أول ما نزل ع العبوة الصغيرة .. يجي معاها شنطة صغيرة يدوية تصلح للسهرات ..

العطر رسمي شوي وجذّاب .. ومن العطور الحلوة .. وبرضو يصلح هدية ..

أقدم عطور أرماني .. “جيو” من العطور الرجالية الكلاسيك ..

أنسب للإستخدام اليومي .. ممكن يناسب الرجال الكبار 30-40 أكثر من الشباب .. عطر رسمي جداً وحلو ..

ممكن يكون هدية ..

هذا الشكل طلّعت منّه أرماني أكثر من عطر .. تختلف بأكثر من لون .. الأسود والأبيض والأزرق ..

فيه بعضها مميز وحلو مثل هذا الأسود .. وفيه بعضها عادي ..

من النسائي المميز منها ..

نسائي أو بنّوتي أكثر .. حلو للإستخدام اليومي .. وللطلعات الخفيفة ..

آخر عطر رجالي طلعوه جورجيو أرماني ..

فريش ورسمي .. يبدو إن أرماني ماسكة خط حلو ومميز .. وهذا اللي يخلي اسمهم قوي ..

جداً حلو العطر .. وتقريباً ممكن أقول فيه نفس الكلام اللي قلته بـ البلاك كود .. مع إنّ روائحهم تختلف تماماً ..

اللي يحتار بالهدية بينه وبين البلاك كود ياخذ الأتتيود .. لأنه جديد ..

آخر عطر نسائي .. Diamonds

عطر نسائي .. سبايس شوي .. يصلح للسهرات والمناسبات ..

عطر مميز فعلاً .. كل ما يبرد تتغير وتحلوّ ريحته .. سبايس شوي ..

كان الوجه الدعائي للعطر المغنية المشهورة “بيونسي”

طلعوا منّه آخر عطر رجالي .. وهو آخر عطر شفته ونزل بالسعودية للحين ..

Diamond For Men

طبعاً العطر مختلف تماماً عن النسائي ..

رسمي جداً .. يصلح للمناسبات .. قوي ..

الصراحة ما جربت دايموند لا النسائي ولا الرجالي ..

لكن شميت ريحتها .. وحاطها بـ الوش لست ..

وأنا أدوّر صور العطور لقيت ذا العطر ..

ماقد شفته بالسوق عندنا أبداً .. العطر نسائي .. ويبدو لي حلو ..

ممكن إنّه جديد وما بعد وصل عندنا .. ممكن ،

أتمنى أفدتكم ،،